Joh 18 | KYG | STEP | Nunumu ago hutege'apae'mo Yesu'e ge'amo ne'afiya vaya'e'mo nopati'mo atale'a lami'a mago ani kalokalopamo agi'amo Kitaloni kalokalopamo lakae'a yosa hoyafi'mo u'a mai'nae.

John 18

Yesu'mo atafau'a kalavusi hu'a ate'naya gemae

(Mt 26:47-56; Mk 14:43-50; Lu 22:47-53)

1 Nunumu ago hutege'apae'mo Yesu'e ge'amo ne'afiya vaya'e'mo nopati'mo atale'a lami'a mago ani kalokalopamo agi'amo Kitaloni kalokalopamo lakae'a yosa hoyafi'mo u'a mai'nae. 2 Apakaemo muki afina'mo u'a ani aupilagamo ali'a anupa hu'a maitale maitale hu'a mai'naya'mofe'mo Yutasi'a kutulu ya'mo ali'niya vekamo'mo ago age'niye. 3 Yosa hoyafi'mo mai'nage'apae'mo mono hu'a ne'apataya vaya'aite'mo yagai'a ne'apataya vayanagi Falasi vayanagi gamani ati vayanagi alopa mono note'mo ne'yagaiya ati vayanagi hu'a ali'a apate'nage'a u'nae. Yutasi'a apavaletege'a ata kani ae'a alige lamu kani'mo ae'a alige kaveta kayo'mo alige naipemo alige hute'a e'nae. 4 E'a ava'yi hu'nageno'ae'mo Yesu'a agai'a agufale'mo afole aisiya kava'mo ago age'niya'mofe'mo, lapakaemo ina la'mo agesayafe'mo kahauya hulitapa ne'ae, huno apafi ge'nige'apae'mo, 5 Yesu'a Nasalasa taonifi vekamo agesunafe'mo ne'one, hu'a ha pai'nageno'ae'mo, ani vekamo ma nagaeke'mae, huno hapa pai'niye. Yutasi'a kutulu ya'mo ali'niya veka'e'mo magokepi lokae'a he ti'a mai'nae. 6 Yesu'a halate hu'niya gemo huno, ani vekamo ma nagaeke'mae, huno hapa nepaige'apae'mo apakamelagati'mo apaune hetale'a u'a mopafi'mo apago'ya fai'nae. 7 Halate Yesu'a, ina la'mo agesayafe'mo kahauya hulitapa ne'ae, huno apafi ge'nige'apae'mo, Yesu'a Nasalasa taonifi vekamo agesunafe'mo ne'one, hu'a ha pai'nageno'ae'mo, 8 Nagaemo, ani vekamo mai'nove, hu'na ago lapa pai'nove. Lapakaemo nagaemo nagesayafe'mo e'naya'mofe'mo mani vaya'mo afa'a apatalege'a viyo, huno hapa pai'niye. 9 Yesu'a hogoteno nunumu huno'ae'mo, apavaleka nami'nana vayapati'mo magoke vekamo atale'nogeno lageso osu'nifa muki'amo afa'a mai'nae, huno hu'niya gemo afole aisiyafe'mo ani gemo hu'niye. 10 Saimoni Pita'a naipe'aleti'mo asagino hogote vekamo mono hu'a ne'apataya vaya'aite'mo yagaino ne'apateya vekamo ali'ya'amo ne'aliya vekamo lamaga aupilaga agesamo heno lafe huno atale'niye. Ani vekamo agi'amo Malakasi'ae. 11 Yesu'a Pitafe'mo, naipekamo halate ano'afi'mo alika faika falu kao. Afo'nimo'mo alino nami'niya kapufi ani'mo o'nesufiye, huno ha pai'niye.

Yesu'a avaleli'a Anasitegamo u'naya gemae

12 Inagi gamani ati vayanagi apakaete'mo yagaino ne'apateya vekamogi alopa mono note'mo ne'yagaiya ati vayanagi hu'a Yesu'mo atafau'a ayatalate'mo nofi ki'a ate'nae. 13 Hogote'a Anasi notegamo avaleli'a u'nae. Ani kafugamo hogote vekamo mono hu'a ne'apataya vaya'aite'mo yagaino ne'apateya vekamo agi'amo Kaiyafasi'ae. Kaiyafasi ayemo'amo'mo Anasi'ae. 14 Hogoteno Kaiyafasi'a Yu vaya'mogimo hisaya kavafe'mo, magoke vekamo'a muki vaya'mogitalefe'mo falino latesigeta hano osuta afa'a maisunana kanale hugiye, huno hapa pai'niye.

Pita'a Yesufe'mo o'age'nova vekae, huno hu'niya gemae

(Mt 26:69-70; Mk 14:66-68; Lu 22:55-57)

15 Yesu'a avaleli'a u'nage'anae'mo Saimoni Pita'e mago vekamo ge'amo ne'afiya veka'e'mo apakame hu'ana u'ana note'mo ava'yi hu'na'ae. 16 Pita'a kegi'ya malaga hi'yanale'mo mai'nigeno alu vekamo hogote vekamo mono hu'a ne'apataya vaya'aite'mo yagaino ne'apateya vekamo'a alu vekamo age'niya'mofe'mo ani vekamo Yesu'e'mo kegi'ya yu'ilagamo fale'ana hai'na'ae. Ani vekamo'a halate lamino hi'yanale ne'yagaiya a'mafa'ne'aife'mo ha paiteno Pita'a avalelino uno hai'niye. 17 Ani a'mafa'nemo'a Pitafe'mo, kagaemo ani vekamo ge'amo ne'afina vekamo mai'napiye, huno afi ge'nigeno'ae'mo Pita'a, ha'ao, huno ha pai'niye. 18 Yasi hige'apae'mo ali'ya'mo ne'aliya vaya'e alopa mono note'mo ne'yagaiya ati vaya'e'mo hokanufa atamo kaete'a he ti'a loto hu'a mai'nae. Pita'e'mo uno magokepi he ti'a atale'mo loto hu'a mai'nae.

Hogote vekamo'mo Yesufe'mo agenoka huno ge huno afi ge'niya gemae

(Mt 26:59-66; Mk 14:55-64; Lu 22:66-71)

19 Kumatega mai'nageno hogote vekamo'a Yesufe'mo agenoka huno'ae'mo, gekamo ne'afiya vaya'mo haiya agufa vaya'mo mai'nae, huno afi ge, na agufa gemo alika apaya ne'malane, huno afi ge huno afi ge'nigeno'ae'mo 20 muki afina'mo vaya apaulagale'mo mai'ne'nae'mo ae'na hakalo hu'na hapa pai'nove. Nagaemo ali'a anupa hu'a mai'nayategamo u'na alopa mono nopinagi muki asole mono no'afi'e mono no'afi'e'mo ali'na apaya male'nove. Mago gemo ali'na fala oki'na muki ge'amo hu'na afole hapa pai'nove. 21 Na kava higekae'mo nagenoka huka nafi nekane. Ge'nimo ali'na apaya male'nova vaya'mogimo ani gemo ago afi'nayanagi ge huka apafi go, huno ha pai'nigeno 22 mago ati vekamo'a aya'mo alino ataleli'neno amagiteno'ae'mo, hogote vekae'mo ani agufa gemo nehapiye, huno afi ge'niye. Yesu'a ge'ale'mo aeno atagaina huno ha paino'ae'mo, hosu gemo hu'nisuvana ani hosu ge'nimo aeka hakalo huka huvo. 23 Alagepa gemo hu'nisuvana na kava higekae'mo ne'namagine, huno ha pai'niye. 24 Inagi Yesu ayate'mo nofi ki'a ate'nageno mai'nigeno'aeke'mo hogote vekamo Anasi'a Kaiyafasitegamo alino ate'nigeno u'niye.

Pita'a halate, o'age'nova vekae, huno hu'niya gemae

(Mt 26:71-75; Mk 14:69-72; Lu 22:58-62)

25 Yesufe'mo agenoka huno afi gegeno'ae'mo Pita'a atale'mo he tino loto huno mai'niye. Apakaemo, kagae'e'mo ge'amo ne'afiya vayapati vekamo mai'napiye, hu'a afi ge'nageno'ae'mo, ha'ao, nagaemo ani vayapati vekamo o'mai'nove, huno hapa pai'niye. 26 Mago vekamo hogote vekamo ali'ya'amo ne'aliya vekamo agesamo Pita'a heno lafe hu'niya vayapati vekamo'mo Pitafe'mo, agae'e'mo yosa hoyafi'mo mai'nanage'na kage'nofiye, huno afi ge'nigeno'ae'mo 27 halate, ha'ao, huno ha nepaigeno'ae'mo kokolemo'mo age ai'niye.

Yesu'mo avaleli'a Pailatitegamo u'naya gemae

(Mt 27:1-2,11-14; Mk 15:1-5; Lu 23:1-5)

28 Saufamo kotilamiyapi'mo Kaiyafasi notegati'mo Yesu'mo avaleli'a ala gamani vekamo notegamo u'naya'monanafa hopa afina'mo Pasova ne'ya'mo nesayafe'mo apakesa afite'apae'mo, fiku yanageno lagufamo alino hosu huno lategaiye. Yu nofi vekamo o'mai'niya'mofe'mo no'afi'mo ohaigune, hu'a hute'a agotimo nehaya nopi'mo fale'a ohai'nae. 29 Inagi Pailati'a kumatega uno lamino, ani vekamo na agufa kavatetife'mo agoti hutapa atesayafe'mo nehae, huno apafi ge'nige'apae'mo, 30 hosu kava'mo osu'niyesinana kagaetegamo afa'a avalelita o'me'nonesine, hu'a ha pai'nageno'ae'mo, 31 Pailati'a, kanalenagi avalelitutapa ke'aepa getapileti'mo agoti hutapa ateyo, huno hapa pai'nige'apae'mo, gamani vaya'mogitapamo, agoti hutapa apatetetapae'mo kamiti o'apamagiyo, hutapa laha pai'nae. Lagae agotilegage'mo apavalelitapa eyo, hutapa ago laha pai'nae, hu'a ha pai'nae. 32 Yesu'a hogoteno huno'ae'mo, ani agufa kava'mo hu'na faliguve, huno hu'niya gemo afole aisiyafe'mo ani agufa kava'mo afole ai'niye. 33 Pailati'a halate agoti nopi'mo haino Yesufe'mo, Yu vaya'aite'mo ala'apimo yagaika ne'apatana kini vekamo mai'napiye, huno afi ge'nigeno'ae'mo, 34 Kagaikamo kagesa afika ani gemo nehapi Yu vaya'mogimo nava gemo hu'a kaha pai'nagekae'mo nehane, huno afi ge'nigeno 35 Pailati'a, Yu nofi vekamo mai'nofiye. Ha'ao, Yu vekamo o'mai'nove. Kagae nofi vaya'mogi'e mono hu'a ne'apataya vaya'aite'mo yagai'a ne'apataya vaya'mogi'e'mo kalavusi hu'a katete'a kavaleli e'a nami'nagi kagaemo na agufa kava'mo hu'nane, huno afi ge'nigeno 36 Yesu'a, Ma mopafi vaya'mogi ala'apimo mai'ne'a yagai'a ne'apataya kava hu'na yagai'na no'apatove. Ani agufa kava'mo hu'na yagai'na ne'apatovesinana ali'ya'nimo ne'aliya vaya'mogimo navaleli e'a Yu vaya'mo o'apamisayafe'mo kame hu'naesina'monanafa ma mopafi vaya'mogi ala'apimo yagai'a ne'apataya agufa kava'mo hu'na yagai'na no'apatove, huno ha pai'nigeno 37 Pailati'a, ani gemo hu'nana'mofe'mo ala'apimo yagaika ne'apatana kini vekamo mai'napiye, huno afi ge'nigeno'ae'mo, he, ani gemo ago nehane. Ita'nimo'mo alino nate'nige'nae'mo magoke kava'mo hu'na lama gele'mo ha maesuvafe'mo ma mopafi'mo afole ai'nove. Muki vaya'mogi lama gemo ao vaya'amogi ge'nimo ne'afiye, huno ha pai'nigeno 38 Pailati'a, ani lama gemo na agufa gee'mo hane, huno afi geno'ae'mo Pailati'a halate kumatega uno lamino Yu vaya'aife'mo, amagisuva kava'mo aepa'amo o'age'nove. 39 O'age'nova'monanafa lapakaemo amuse hisayafe'mo nagaemo Pasova afina'mo kafuga'ae kafuga'ae'mo kalavusi hu'naya vayapati'mo magoke vekamo hatu mae'na atogeno ute ute nehae. Nehuva'mofe'mo nagaemo alatapimo yagaino nelapateya kini vekamo afa'a atesugeno lapakaetegamo visifiye, huno apafi ge'nige'apae'mo 40 alopa gefati'mo ge hu'apae'mo, agaemo alagi ategeno o'vinageka Malamasike'mo ategeno vino, hu'a ha pai'nae. Malamasi'a vaya'mo apamagiteno kumaya ne'aliya vekamo mai'niye.